السبت، ديسمبر 25، 2010

مـش دايمـــــ(2)ــــا


هوه مش انا قولت
انى مش عاوزة
اكتب كلام هنا يزعلك و يزعلنى ؟
طب برجع ف كلامى ليه دلوقتى ؟!!
يمكن 
يمكن لأنك واحشنى قوى 
وتعبت أخبى الحكاية دى
عشان بعمل حساب اللى حواليا 
واللى بيتعبولى سلف بسبب بعادنا ؟
او يمكن كمان عشان الناس التانية
اللى خلاص زهقوا من حواديتى معاك 
وبيقولوا كفاية ..شوفيلك حل 
يا تشوفيه وتدورى عليه 
يا تسكتى وتنسيه 
وقرارك تتحمليه
تعرف ؟
انا مبزعلش من الكلام دا 
لأنه صح 
أيوه  ... هما صح
المفروض اللى ياخد قرار يكون قده
ميرجعش يعيط ويقول أى 
و يا تشيل الحمل و تسكت 
يا ترميه ع الأرض وتقول مش لاعب
1+1 = 2 .. المنطق والعقل بيقول كدا 




مشكلتى يا حبيب ماما 
انى من قبل وجودك ف حياتى 
وانا عايشة بلا منطق ولا حسابات العقل
و آه صحيح ..المفروض
رميت الحمل شكلاً ومضمونا 
بس مع ذلك 
لسه حساه موجود على ضهرى 
و تقييييل قد جبل
ولسه قلب ماما اللى لما بيحب 
بيحب مهما كان او حصل
وطبيعى لما تكون ف حياتى 
هتكون اول حد تنطبق عليه جنوناتى 
و لهذا ... منطق حكايتى معاك 
بيقول ان 1+1 مش هيكون ب = 2 دايما 
و مش قادرة استوعب 
بصراحة الفكرة دى مهما الوقت عدى
فكرة انى انساك 
وابطل اجيب سيرتك كأنك موجود معايا
وابطل احط صورتك حواليا ف كل مكان
وابطل اشتريلك حاجات
ولو مش مناسبة لسنك دلوقتى ولا مزاجك 
مش قادرة اعتبر غير انك مسافر 
وراجع بعد حين 
انا لسه لحد النهاردة بحط هدومك 
ف رف دولابى عشان احس انك 
لسه ساكن معايا ف اوضة واحدة 
 ولما الشتا دخل بقيت مبسوطة 
لأنى هبتدى البس شراباتك الصوف
واحس ان في حاجة بتجمعنا




تعرف كمان ؟
أوقات بعمل زى المجانين 
وأرمى لعبة من لعبك ف الأرض 
و بعدين اقف قصادها شوية كدا 
عشان اتخيل يوم من ايام زمان 
لما كنت اتكعبل فى لعبة واندهك 
وازعق واعمل فيها ماما 
وافضل ادى ف نصايح عن النظام 
والأنضباط و عن ازاى انك مجرم
و ليه مبتسمعش الكلام
وانهى الخطبة .. بالسؤال المعتاد
وانا ببص ف السقف واقول 
ليه يا رب عملت كدا فيا  ؟
فضميرك يوجعك وتحس انك غلطان
فتقولى خلاص ..معلش .. اسف
طب تعرف كماااان  ؟
انا وحشنى قوى عدم سمعانك للكلام
و وحشنى شقاوتك و أجرامك
و وحشنى افكارك المثالية 
و وحشنى كمان الفاظك الغريبة والمميزة
ووحشنى كفك الصغننة دى 
وهيا بتطبطب على كتفى
لما كنت بعيط لأى سبب 
وتبقى انتا مش فاهم ليه 
بس عندك استعداد تكسر الدنيا 
وتفجر قنبلة ف اللى مزعلنى أى كان مين
المهم ابطل عياط عشان انتا كمان هتعيط
وعشان مينفعش حد يزعل مامتك 
وانتا متخدش موقف حاسم 
وانتا راجلها و اسدها الشجاع
وحشنى قوى 
كل حاجة 
يا ترى انا ظلمتك يا يوسف ؟
بجد 
اوقات كتير قوى بحس
انى ظلمتك معايا بشكل فظيع
وبدون ما اكون ببالغ او قلباها دراما
انتا اتاخد حقك 
مش بس عشان اتحرمت 
بسبب مشاكلى من حياة طبيعية
زى باقى العيال 
و يمكن دا يكون افضل 
اهو ع الأقل قعدت ف حضنى كفاية
عشان تفتكرنى حتى
بس انا بتكلم عن ظلم تانى 
معرفش انتا حاسس بيه دلوقتى ولا لأ 
يا ترى انا غلطت لما ربيتك
تحب الدنيا وتثق ف نفسك ؟
غلطت لما علمتك ان الصح صح 
والغلط غلط و بيؤدى لكوارث وظلم لغيرك 
والمفروض تبقى دايما صح 
وانتا دلوقتى ف العالم الحقيقى 
ومفيش كدا
وتقريبا اللى بيحصل عكس كدا ؟!
يبدو انى كنت غلط ؟
يا ترى احساسك ايه بعد ما شفت 
ان كل حاجة حكيتلك عنها 
كانت مجرد كلام
وان الواقع مليان أخطاء و قرف
والحياة مهياش كارتون والوان 
ولعب و حواديت و ناس كويسين 
و حضن كبير دايما من ماما
وماما نفسها 
بتقول عليها ايه ف سرك  ؟
لما بتلاقيها مبتتصلش بيك
وتسال عنك ولا بتحاول تشوفك ؟
انا عارفة انى وعدتك زمان 
انى مش هسيبك الا غصب عنى 
وافضل افتكرك لحد ما الظروف 
تسمح و ارجعك من تانى لحضنى
.................
ماما
ماما لسه عند وعدها يا حبيبى 
مفيش حاجة اتغيرت 
بس انا مش عارفة هفضل لحد امتى 
الظروف معاندانى والخوف بيشلنى 
ويوقفنى مكانى و الدنيا تفرقنا كدا ؟
مش عارفة هينفع ييجى اليوم واحكيلك
عن كل أسبابى  ومبرراتى 
ولا عمره ما هييجى
متهيألى يبقى ظلم اكبر منى
لما اطالبك مع ضعفك وكل اللى انتا فيه 
انك تقدر ضعفى انا كمان




بس بتمنى بجد انه
ممكن يجى اليوم اللى تكبر فيه
كفاية عشان تفهمنى ومتزعلش 
على كل اللى راح منك ومنى
انا مش عايزة اقولك كلام كبير
ادافع بيه عن نفسى 
لأنى زمان معملتهاش 
ولا دلوقتى متهيألى هينفع
بس انا معترفة بذنبى .. ف حقك 
لو كان الإعتراف هيفرق



مش عارفة ايه لازمته كل اللى فات
وايه اللى جابه على بالى 
يمكن بس كل الحكاية
انى حبيت اقولك 
......
انى بحبك 

وانك 
......
وحشتنى قوى
......
و
بس

------------------------------


هناك 12 تعليقًا:

فاتيما يقول...

شمس النهار يقول...

فاتيما
حتي لو اللي بنحبه مش سامع ولا حاسس
بس بيريح اوي ان تكتبي او حتي تكلمي نفسك
وتتخيلي انه سامع
ساعات كتير امسك نفسي بكلم بابا
اه
بحكيله بعاتبه بيني وبين نفسي
ساعات اضحك واقول ايه ده يامجنونه
وساعات الدموع تبقا مصلحاني واعيط علشان هو مش معايا ولا سامعني

ماهو لو مابنحبهمش مش هيوحشونا اوي كده
ربنا عادل صدقيني
وهيقر عينك بعودة يوسف

Sally يقول...

الاغنيه مع الكلام اللي انتي كتباه
مع مودي
=
هي اكتر من دموع

القصه انك مش هتستريحي يا فاتيما
غير لما حد بعينه هو اللي يقولك
انك مظلمتهوش
وانه بيحبك اوووووووووي
واكتر

حفيدة عرابى يقول...

أكتر حاجة بحبها فيكِ ياطمطم انى مصدقاكِ

أما بالنسبة ليوسف فمعنديش غير ثقتى فى ربنا يحميه ويفهمه ويعلمه ويرده ويفرحه ويفرحك

عصفور السطح يقول...

جميله اوى اوى

Ramy يقول...

مش هقول حاجة عن البوست

ها

مبروك شكل المدونة الجديد (:

ماجد العياطي يقول...

تدوينتك افاضت كلام كتير كان مستخبي جوايا

ظهر وطلع بس في شكل دموع

ربنا يجمعكم انتم الاثنيين دايما مع بعض

في الدنيا والآخره

تحياتي

bastokka طهقانة يقول...

بكتيني و انا صعب ابكي
و وجعتيني و انا كنت بدور على حاجة تطبطب عليا
رغم اني مش فاهمة قوي ايه سبب البعاد بس اتوجعت
ربنا يصبرك على بعاده و يجمعكم سوا
....

غير معرف يقول...

انا باعيط
............
..............
...............
................
..................
وبادعيلك ربنا يحفظه ويحميه ويطلع احسن بنى ادم فى الدنيا
عارفة يافاتيما
اول ماعرفتك وكنت باشوف بوستاتك
كتير اووى كنت باتمنى انى اكون قريبتك ويكون معايا حاجة كده زى واسطة
اشوف اللى واخد منك يوسف واروح له واكسر دماغ اللى جابوه واعرفه شغله واحذره انه يتعامل معاكى بالادب وعايز يشوف ابنه يشوف بالادب وا حركة كده ولا كده فيها رقاب -عارفة انتى شغل مسلسلات رمضان اللى فات ده -واخد منه يوسف
اخده انا الاول اه استنى بس
ماترفعيش حواجبك كده
هاخده الاول واروح بيه على اى سايبر-هابتديها انحراف مع الواد- او يكون ربنا كرمنى وجبت لاب توب وافتح المدونة بتاعتك واوريله كل كلمة كتبتيها
وكل حرف من زمان بعيد اووى
واقوله ماما دى اعظم ست فى الدنيا وطيبة اووى وقلبها جميل اووى وان املها فى الدنيا تكون مبسوط وانت معاهاوتكون اجمل حد فى الدنيا
وبعدها بقى نعمل حفلة كبيييييييييييييييييييييييرة
يكون فيها كل اللى بيحبوا فاتيما وبيعشقوا يوسف
ويوسف بقى يجيله هدايا كتير بقى ويعرف ان الناس دول بيحبوه من كتر ما ماماكانت على طول بتتكلم نه وانها عمرها مااتخلت عنه
بس كده
وانا بقى اكمل عياط وانتى قلبك يطير من الفرحة


اطلب منك طلب
ماتزعليش من التعليق
الكلمتين دول محشورين فى زورى من زمان
وقولت بدل ماانا باحلم لوحدى اشاركك معايا

بصى بقى
هاتى حضن وخلاص:‘(

MaNoO يقول...

عارفه ربنا مفيش أحن منه اه والله
ربنا جميل وبيحبنا اوى لو وثقنا فيه وقلنا يارب فى سجدتك قولى يارب
انتى اتكلمى وخرجى اللى جواكى بس متشيليش نفسك كل حاجه ربا مقالش نعمل فى نفسنا كدا اتمنى وادعى ان ربنا يجمعكم وبعد كدا كل حاجه تتحل الام اللى تتكلم بالطريقه دى اكيد ربت ابنها صح والعيب فى المجتمع طالما انتى شايفه انه صح
الحب اللى طالع منك لازم يبقى هو حاسس بيه كل حاجه فى الدنيا بتقول كدا ان الحب روحين وتبادل
برغم كل دا فى ابتسامه فى كتابتك وكلامك ودى اللى حاببها ودى اللى تتمسكى بيها وتخليها الأمل بتاعك ان شاء الله هيحصل كل خير ليكى وليه احسن مما تتمنى
معلشى طولت عليكى بقى انا شفت البوست صدفه كدا متعود انا ادخل على هناك علطول
احترامى لكل حرف خرج منك

ALLELIO-عليــــلـــيـــــــــــــــــو يقول...

البوست موثر جدا
دمتى بخير

ALLELIO-عليــــلـــيـــــــــــــــــو يقول...

الروح الانهزامية

الشعب الذى لاينجح

بلد القنبلة (السكانية ) مش النووية

مصطلحات انهزامية كتير تم بثها فى عقولكم منذ زمن لغرض واحد فقط

تعطيب امكانيات مصر عن التاثير على القرار الغربى فى المنطقة العربية

ونجحوا الى حد بعيد انهم يخلوا المصريين عازفين عن مشاكل دينهم ووطنهم واصبح همهم الاول توفير لقمة العيش

كان الله فى عونا جميعا

دمتى بود

Related Posts Plugin for WordPress, Blogger...