السبت، ديسمبر 25، 2010

مـش دايمـــــ(2)ــــا


هوه مش انا قولت
انى مش عاوزة
اكتب كلام هنا يزعلك و يزعلنى ؟
طب برجع ف كلامى ليه دلوقتى ؟!!
يمكن 
يمكن لأنك واحشنى قوى 
وتعبت أخبى الحكاية دى
عشان بعمل حساب اللى حواليا 
واللى بيتعبولى سلف بسبب بعادنا ؟
او يمكن كمان عشان الناس التانية
اللى خلاص زهقوا من حواديتى معاك 
وبيقولوا كفاية ..شوفيلك حل 
يا تشوفيه وتدورى عليه 
يا تسكتى وتنسيه 
وقرارك تتحمليه
تعرف ؟
انا مبزعلش من الكلام دا 
لأنه صح 
أيوه  ... هما صح
المفروض اللى ياخد قرار يكون قده
ميرجعش يعيط ويقول أى 
و يا تشيل الحمل و تسكت 
يا ترميه ع الأرض وتقول مش لاعب
1+1 = 2 .. المنطق والعقل بيقول كدا 




مشكلتى يا حبيب ماما 
انى من قبل وجودك ف حياتى 
وانا عايشة بلا منطق ولا حسابات العقل
و آه صحيح ..المفروض
رميت الحمل شكلاً ومضمونا 
بس مع ذلك 
لسه حساه موجود على ضهرى 
و تقييييل قد جبل
ولسه قلب ماما اللى لما بيحب 
بيحب مهما كان او حصل
وطبيعى لما تكون ف حياتى 
هتكون اول حد تنطبق عليه جنوناتى 
و لهذا ... منطق حكايتى معاك 
بيقول ان 1+1 مش هيكون ب = 2 دايما 
و مش قادرة استوعب 
بصراحة الفكرة دى مهما الوقت عدى
فكرة انى انساك 
وابطل اجيب سيرتك كأنك موجود معايا
وابطل احط صورتك حواليا ف كل مكان
وابطل اشتريلك حاجات
ولو مش مناسبة لسنك دلوقتى ولا مزاجك 
مش قادرة اعتبر غير انك مسافر 
وراجع بعد حين 
انا لسه لحد النهاردة بحط هدومك 
ف رف دولابى عشان احس انك 
لسه ساكن معايا ف اوضة واحدة 
 ولما الشتا دخل بقيت مبسوطة 
لأنى هبتدى البس شراباتك الصوف
واحس ان في حاجة بتجمعنا




تعرف كمان ؟
أوقات بعمل زى المجانين 
وأرمى لعبة من لعبك ف الأرض 
و بعدين اقف قصادها شوية كدا 
عشان اتخيل يوم من ايام زمان 
لما كنت اتكعبل فى لعبة واندهك 
وازعق واعمل فيها ماما 
وافضل ادى ف نصايح عن النظام 
والأنضباط و عن ازاى انك مجرم
و ليه مبتسمعش الكلام
وانهى الخطبة .. بالسؤال المعتاد
وانا ببص ف السقف واقول 
ليه يا رب عملت كدا فيا  ؟
فضميرك يوجعك وتحس انك غلطان
فتقولى خلاص ..معلش .. اسف
طب تعرف كماااان  ؟
انا وحشنى قوى عدم سمعانك للكلام
و وحشنى شقاوتك و أجرامك
و وحشنى افكارك المثالية 
و وحشنى كمان الفاظك الغريبة والمميزة
ووحشنى كفك الصغننة دى 
وهيا بتطبطب على كتفى
لما كنت بعيط لأى سبب 
وتبقى انتا مش فاهم ليه 
بس عندك استعداد تكسر الدنيا 
وتفجر قنبلة ف اللى مزعلنى أى كان مين
المهم ابطل عياط عشان انتا كمان هتعيط
وعشان مينفعش حد يزعل مامتك 
وانتا متخدش موقف حاسم 
وانتا راجلها و اسدها الشجاع
وحشنى قوى 
كل حاجة 
يا ترى انا ظلمتك يا يوسف ؟
بجد 
اوقات كتير قوى بحس
انى ظلمتك معايا بشكل فظيع
وبدون ما اكون ببالغ او قلباها دراما
انتا اتاخد حقك 
مش بس عشان اتحرمت 
بسبب مشاكلى من حياة طبيعية
زى باقى العيال 
و يمكن دا يكون افضل 
اهو ع الأقل قعدت ف حضنى كفاية
عشان تفتكرنى حتى
بس انا بتكلم عن ظلم تانى 
معرفش انتا حاسس بيه دلوقتى ولا لأ 
يا ترى انا غلطت لما ربيتك
تحب الدنيا وتثق ف نفسك ؟
غلطت لما علمتك ان الصح صح 
والغلط غلط و بيؤدى لكوارث وظلم لغيرك 
والمفروض تبقى دايما صح 
وانتا دلوقتى ف العالم الحقيقى 
ومفيش كدا
وتقريبا اللى بيحصل عكس كدا ؟!
يبدو انى كنت غلط ؟
يا ترى احساسك ايه بعد ما شفت 
ان كل حاجة حكيتلك عنها 
كانت مجرد كلام
وان الواقع مليان أخطاء و قرف
والحياة مهياش كارتون والوان 
ولعب و حواديت و ناس كويسين 
و حضن كبير دايما من ماما
وماما نفسها 
بتقول عليها ايه ف سرك  ؟
لما بتلاقيها مبتتصلش بيك
وتسال عنك ولا بتحاول تشوفك ؟
انا عارفة انى وعدتك زمان 
انى مش هسيبك الا غصب عنى 
وافضل افتكرك لحد ما الظروف 
تسمح و ارجعك من تانى لحضنى
.................
ماما
ماما لسه عند وعدها يا حبيبى 
مفيش حاجة اتغيرت 
بس انا مش عارفة هفضل لحد امتى 
الظروف معاندانى والخوف بيشلنى 
ويوقفنى مكانى و الدنيا تفرقنا كدا ؟
مش عارفة هينفع ييجى اليوم واحكيلك
عن كل أسبابى  ومبرراتى 
ولا عمره ما هييجى
متهيألى يبقى ظلم اكبر منى
لما اطالبك مع ضعفك وكل اللى انتا فيه 
انك تقدر ضعفى انا كمان




بس بتمنى بجد انه
ممكن يجى اليوم اللى تكبر فيه
كفاية عشان تفهمنى ومتزعلش 
على كل اللى راح منك ومنى
انا مش عايزة اقولك كلام كبير
ادافع بيه عن نفسى 
لأنى زمان معملتهاش 
ولا دلوقتى متهيألى هينفع
بس انا معترفة بذنبى .. ف حقك 
لو كان الإعتراف هيفرق



مش عارفة ايه لازمته كل اللى فات
وايه اللى جابه على بالى 
يمكن بس كل الحكاية
انى حبيت اقولك 
......
انى بحبك 

وانك 
......
وحشتنى قوى
......
و
بس

------------------------------


الاثنين، سبتمبر 20، 2010

طـــعـــم الحــــياة ( يوم إفتراضى )




يلا يا قطة 
صح النووووووم يا حبيبى 
المنبه ضررررب 
يا يوووووووسسسسسيييييييييف



لأ ..متبصليش البصة دى
لحسن هقول كلمة مش كويسة ع الصبح
مهو مش سيادتك تناملى متآخر 
و انتا عارف كيويس ان فيه مدرسة بكرة 
و متلحقش تاخد كفايتك من الراحة 
كل هذا بمزااااجك
و بعيييين تصحالى مكشر ومتعكنن 
مش منظر يعنى 
يلا سيادتك قوم وحالااااا
قولى يا ماما صباح الخير 


لأ بالمنظر النيلة و الوش مش المغسول 
و لا السنان دى ... مينفعش
ذنبى ايه انا !!!
روح الحمام والبس  واتهندم
و اشوفك زى القمر مفيكش غلطة
و انتا منور كدهون ف لبس المدرسة
  ساعتها الصبح ييجى بجد 
هروح المطبخ و ارجع الاقيك جهزت
ماشى ؟




ايه ؟؟ ... لأ طبعا 
مينفعش تشغل الكمبيوتر و تسمع اغانى
اختك لسه مغمضة عيونها و خخخخخ 
من ساعة يا دوب
 و ما صدقت انها راحت ف النوم  
لأ .. و مينفعش تبوسها كمان 
 هتقلقها و تصحييييها 
طب ..احدف البوسة من بعيد 
هتوصلها بالبريد الجوى
الله ...  يعنى هيه حبكت
وخلاص الحب بيدلدق دلاديق ع الصبح !!!
بكرة تكبر يا خويا وتجرجرها وراك ع المدرسة 
اما نشوف ساعتها هتعرف تخلى بالك منها 
و لا الندالة المتآصلة هتتجلى 
و تقولى اوف و زهقت و مليش دعوة و الحركات
بتاعت الولاد دى 
مش هتقول كدا خاااالص ؟!!! 
يا سلام؟!! ... هنشوف
و اما ترجع ابقى لاعبها و بوسها 
زى منتا عايز 
دلوقتى .. ع الحمااااااااام


احم احم
من هذوها الفتى الوسيم 
اللى ظهر ف بيتنا  فجأة
انتا عاوز مين حضرتك ؟؟؟!!
عاوز يوسف ؟
لأ ..انتا يوسف ؟!!؟
متأكد ؟
يا لهوتينى ... معقوله هذا هو ابنى ؟؟؟
و لا استاذ جامعة و رئيس وزرا يا ناس 
مش شكل شاب صغنن و رايح مدرسة 
يا خراااااااشى على الوسامة 
طب مش حرام علينا اللى هيحصل للبنات دلوقتى
يعنى البنية من دول تركز مع الميس 
و لا تقعد تعاكس فيك بقااااااا
انتا قمر يا حبيبى 
و اجمل حاجة ان الشنطة جاهزة من بليل
بحب انا الناس المستعدة دى و منظمة حالها 
اصل  يسوفى
مش زى العيال ... قصدى الرجالة الملخبطة
الزنانة الرخمة دى



عمو ؟
دا نايم يا حبيبى و ف سابع نومة 
اصله جه امبارح متآخر وكنت سعادتك 
بتاكل رز مع الملايكة
كان نفسه يشوفك 
دخل بص عليك وانتا نايم 
و باس جبينك وسابلك المصروف بتاع اول يوم 
انا قولتله .. مش لازم يعنى وشكراً
بس هوه قالى ..يوسف دا ابنى و حبيبى  و صديقى
و اول يوم دا مميز جدا عنده و عندى
و قررت ابقى الراعى الرسمى لليلة دى 
مرضتش اقوله لأ .. اصله بيحبك  فعلا
و مينفعش حد يحبنا كدا ونكسفه 
قال هيستناك لما ترجع 
و نتغدى كلنا سوا و تحكيله عملت ايه النهاردة
 

نعمممممممممم ؟
مصروف منى انا روخرا ؟
ايه شغل النصب دا
انتا عاوز تاخد مننا احنا الجوز 
لا لا لا ..هوه استكراد ؟!!
طب خلاص خلاص .. النهاردة بس 
اوستثناء ... عشان تدلع نفسك 
بس متخدش على كدا و حياتك 
عشان الميزا .... 
ايوه منتا حافظ اهو
الميزانية لا تسمح 
انتا حبيبى قلبى يا يوسف 
و انا بحبك عشان عاقل و اخلاق





اتفضل كيس الاكل و ابقى اشترى عصير 
و حاجة حلوة زى ما تحب 
بس تحذيييييييير هاااااااام 
السنكوتشات دى لو متكلتشى 
و رجعتلى بيها تانى ...هنضطر اخد موقف احتجاجى 
 و هتفضل بقى من غير اكل
لحد ما ترجع تتغدى .. ماشى؟
طيب
لأ مش وقت لعب مع القطط خااااااالص 
احنا لازم ننزل عشان نلحق الطابور من اوله 
و نسأل على ميت حاجة
يلا بقى روح فرجّ تيتة شكلك الجميل 
و بوسها 
و قولها احنا نازلين و عاوزة حاجة يا توتا
و يا قطتى و دلعها و كدا 



طبعا مفيش داعى ادى نصايح من عينة 
خد بالك من نفسك يا بابا 
و متسمحش لحد يقربلك 
او يدخل معاك الحمام و النظام دا 
و رد ع الناس بأدب و خلى بالك من العيال الصغننة
اوعى تخبط فيهم توقعهم 
و الشنطة تخلى بالك منها 
و ... ماشى ماشى عارفة انك عارف 
و سمعت الكلام دا ميت مرة 
معلش ..خليهم مية و واحد 
يا بنى انا شغلتى مامتك 
يعنى لازم اقول الطقم دا دايمااااا
فسيبونا نشتغل امهات بذمة و اسكتوا 
اتفضل يا لمض  اسبقنى
و هات الأسانسير

 


يا سلاااااام 
اعظم  اختراع ف الدنيا المدارس دى  
هخلص منك كام ساعة وشوف نعمة روبنا 
ايه بهزر بهزر .......يوووه
هوه مفيش روح دعابة ع الصبح ليه؟
طب قبل ما ننزل ومحدش واخد باله 
هات حضن سريع لماما
..............
يا واد هات حضن بقولك 
بلاش بوسة عشان انا مقدرة الموكف 
انك بنتكسف 
بس الحضن  ايه مشكلته ؟
..........
النداء التالت و الاخييييير 
هات حضن يا مجررررررم 
طب دا ليا انا مش عشانك 
يعنى اصول تدعمنى معنويا و عاتشفياً 
عشان هتوحشنى لحد ما ترجع 
و عاوزة جرعة حنان مكثفة
.........
ياض تعااااااالى يخربيت كدا 
متخلنيش انتكب حماقة 
تعالى  .... ايوووووووووه 
بس كدا خلاص اتنيلت حضنتك جرى ايه
شكة دبوس 
طب بذمتك حسيت بحاجة ؟!!
ماشى ماشى
انا مش هتكلم معاك دلوقتى 
عشان هراعى انك لسه صاحى م النوم 
و بتمر بوكت عصيب من عمر الوطن
و اول يوم مدرسة  و ...
بس مردودالك يا معلم  و الأيام بيننا


معقول سنة جديدة جت بسرعة كدا ؟
كبرت يا مجرم و بقيت طولى 
والناس كمان شوية هتفتكرك اخويا الصغنن 
مش ابنى 
انا فرحانة طبعااااا
و يمكن استعبط واقول معرفكشى اشاساً 
ال اخويا ال 
انا اخويا ويحيش كدا 
خلاص خلاص متقلبش وشك
وسيم و زى القمر
هوه حد يقدر يقول غير كدا 
دحنا نخلليه يمسك السلك يا كبير




كل سنة و انتا طيب يا حبيب ماما 
و عقبال اول يوم جامعة 
ياااااااااااه 
ربنا يكرمنى  لحد ساعتها عشان اصحيك برضو 
و املى عينى بشكلك وانتا طالب جامعى 
قد الدنيا .. بس مش هوصلك بقى
هانت .. الأيام بتجرى هوا 
اسرع ما أى حد يتصور 
ربنا يباركلى ف عمرك يا حبيبى 


انا مبسوطة انك رديت بأدب 
على طنط جارتنا ف الأسانسير
و هيا بتقولك ازيك  ....عارف ؟
هيا كدا هتقول عليك جنتلمان خالص
صبحّ بقى ع البواب 
انتا هتعدى عليه كل يوم 
و لازم تبقى لطيف ... هوه راجل طيب كمان  
و هيفرح دايما انك فاكره و بتعامله كويس
و انت خلاص بقيت رادل كبير و رايح شغله
هيا المدرسة دى مش شغلتك برضو؟
 يعنى بقيت شاب محترم
و عندك مسئوليات 
انا عارفة انك قدها و قدود 
منتا حبيب ماما و اسد الغابة  الشجاع بتاعى



يلا شارو لأى تاكسى  جاى
و قوله عابديييييين يا اسطى 
لأ .. مش كله السطة 
أيوه صح فعلاً لحد دلوقتى كله السطة 
و معرفش يعنى ايه السطة دى 
بس شكلها كلمة ايطالى معناها
كله كويس و تمام ..فكرنى طيب 
نبقى نسأل بسكوتة لما نرجع
بس الله يكرمك .. بلاش ابو الليف ع الصبح  كدا 
نفسويتى هتنقفل و انتا ميرضكش 
كفاية انك رايح المدرسة يا ميلص 
هستحمل ايه و لا إيه ؟
هاه ؟ .. مين ؟
لأ مش بعيط و لا حاجة 
دا الهوا طرف عينى 
اعيط ليه يعنى ؟
 اصلى مشربتش النسكافيه بتاعى 
فتلاقينى كدا مش مركزة 
لما ارجع هشربه .. و اقعد افكر  فيك
و اقول يا ترى ...يا هل ترى 
يوسف بيعمل انهى مصيبة دلوقتى
و هيكلمونى امتى  تحديداً عشان آجى
اشارك ف فك الحصار  عن الحى كله
و عشان نمشى عربيات البوليس و المطافى
و امن الدولة من قصاد باب المدرسة 
............
بتضحك 
انا افكر فيك كدا و نصصصصص 
دا اقل حاجة خيالى يوصلها  معاك
اصلى عارفة المهازل اللى هتحصل 
مؤدب .. و هادى !!!
طبعننننننن انتا هتقولى ؟!!!
ابنى حبيبى و تربيتى
اهو تاكسى فاضى جاااااى
شاورله يا سى منص و قول يلا  
عابدييييييييين ......يا السطة




كل سنة و انت طيب
يا حبيبى


-----------------------------------------------------------
هدايا من بسكوتة 
دوس هنا و هنا و هنا و هنا وهنا
-----------------------------------------------------------


الجمعة، أغسطس 06، 2010

★۩٭♫٭۩☆ رمضان كريم ☆۩ ٭♫٭۩ ★



----------------------------------------------------

۩ رمـضــــان كــــريـم عليــــك ۩
يا روح قلـــبى انا
وحش
تنى
و يا رب الفانوس اللى إخترتهولك
السنة دى يعجبك


اللى بتحبك علطول
ماما


----------------------------------------------

*
***
*********
**************
*-------------*
*----------*
*-------*
*-----*
*---*
*-*
*****
********
----------------------------------------------------


الجمعة، يوليو 09، 2010

فـرحـــة



ناس فرحانة

السبت، يونيو 12، 2010

يا مـامـا ..أنـا نجـحــت




الووو .. ازيك يا يوسف وحشتنى
انتى كمان
النتيجة طلعت ؟؟
من زماااان
هاه .. طب عملت ايه طمنى ؟؟
نجحت يا ماما
الف مبروووووك يا حبيبى
جبت كام يلا قول وفرحنى

جبت 99%
برافوووووووو عليك .. انتا شطارة
المدرسة قالتلى دى اعلى درجات شافتها
يعنى انت كدا
تبقى من الاوائل ع المدرسة

آه



يا حبيبى ى ى ى ى
يا خرااااااشى
ألف مليون مبروووووووك يا روحى



ياااااه
لو كنت معايا دلوقتى

كنت عملتلك حفلة كبيييييرة
بس هجيبلك هدية النجاح
متقلقشى




مؤقتاً هعملها هنا







عشان نفتكر الفرحة
دى بعدييين


مع انى متأكدة انك هتفرحنى

تانى و تالت و عاشر






ادى الشمعدان
بيبتدى





و المزيكا هتعزف





و الكل هيرقص عشانك



يسووووووووفة
ابقى فكرنى لما نروح فرح او حفلة
نبقى نرقص سلو زى الجميلة و الوحش
انتا خلاص طولت
و بقى ينفع نرقص سوا ..صح؟














الكب كيك بالشكولاتة
بتوعك انتا
و بسكوتة و عادل






و دى بقى ليك
لوحدك خااااالص





البالونات دى مش للفرقعة يا شقاوة
هتفرقها ع اللى حضروا الحفلة
و هما ماشيين




عقبال الأبتدائية
و الأعدادية
و الثانوية

و الجامعة
و الماجستير
و الدكتوارة




و عقبال ما تبقى مهندس كبيييييير

و تفضل تاخد فى شهادات حلوة تنفع بيها الناس
و تبقى شاطر اكتر و اكتر

و افتخر بيك يا حبيبى دايما




النهاردة مامتك حاسة بإحساس
مش عارفة اوصفه


بس يمكن انتا لما تكبر و تبقى أب
اكيد هتحسه و تفهمنى


وتفهم يعنى ايه انك تكون نعمة
فى حياة حد تانى

و تخ
ليه سعيد و مبسوط انك ابنه


انا فخورة بيك قوى يا يسوفتى
و النهاردة حاسة ان انا اللى نجحت
مش ا
نتا ... تصور ؟؟!!




مش همشى غير لما اسيبلك



البوساااااات






و


الحضونااااااااااات







والهدية خ
ليها مفاجأة
و محدش يعرفها غييييرك



ربنا يخليك لماما

يا روح قلب ماما


ب ح ب ك








Related Posts Plugin for WordPress, Blogger...