♥ .. يـوســــف .. ♥

8 إيه رأيكم ف رسوماتى وألواناتى وكل حاجاتى؟:

1. 

   فاتيما
   الجمعة, 06 أغسطس, 2010

   كل سنة و انتا طيب
   يا روح قلبى
   
   
   ادى رمضان جديد جاى
   و انتا مش ف حضنى
   
   
   بص انا مش بقولك كدا
   عشان زعلانة يعنى
   
   
   هوه بصراحة انا زعلانة
   بس مش زعلانة الزعل الوحش دا
   
   انا متضايقة بس لأنك مش معايا
   مش هنفطر سوا على ترابيزة واحدة
   مش هشوفك طول الوقت
   زى ما المفروض يحصل
   
   
   بس انا برضو هفتكرك
   و انا بحط اول لقمة ف بوقى
   و بشرب اول شفطة مية م الكوباية
   و ادعى انك تكون مبسوط
   و بتفطر و انتا بتضحك كدا و مبسوط
   و مش ناقصك حاجة
   
   
   انا روحت مع تيتة نشترى الفوانيس
   ليك و لهشام و سلمى
   
   ههههه
   فاكر لما كنت بتنطقها
   فناويس ... مش فوانيس ؟؟؟؟!!
   
   المرة دى اخترتلك فانوس من الفناويس بتوع زماااان ...
   الصفيح ابو ازاز ملون
   
   انا بحبه اكتر م الحاجات بتاعة الصين اللى بتغنى و ترقص دى ..
   
   معرفش ليه حاسة انك كبرت خلاص
   على الفوانيس العيالى بقى
   و لازم اجيبلك فانوس شكل تانى ...
   يا رب يعجبك
   
   
   تيته حضرت الشمع المخصوص بتاعه
   و حطته مع الفانوس
   و علبة الكبريت كمان يا عم
   انتا عارف تيته ست دقيقة اصلها
   و مبتفوتش حاجة
   و عاوزة تجيبلك الدنيا بحالها
   
   
   و انا كمان نفسى اجيبلك كل حاجة حلوة عشان تبقى مبسوط ..
   بس معلش
   هقولك الكلمة السخيفة اياها
   اللى دايما اقولها ..
   الظروف يا حبيبى
   بتمنعنى و تمنعك من الف حاجة
   معلش
   
   
   كل سنة و انتا طيب يا روح قلبى
   كل سنة و انتا ابنى حبيبى
   و انا مامتك اللى فخورة بيك
   و بتتمنى تشوفك احسن واحد ف الدنيا
   بتنفع الناس و تنفع نفسك
   
   
   انا بحبااااااااك قوى قوى
   و انتا وحشتنى قوى قوى
   و رمضان كريم عليك يا حبيبى
   و ربنا اكرم قوى قوى قوى
   
   بوسات
   و حضونات
   و فناويس
   ۩

1. 

   كيــــــــــــارا
   الثلاثاء, 10 أغسطس, 2010

   كل سنة وانت طيب يايوسف ياحبيب خالتو
   
   السنة الجايه باذن الله هجبلك فانوس وانت في حضن مامي

1. 

   Wanda
   الأربعاء, 11 أغسطس, 2010

   بص بقى يا سى يوسف
   ماما قالت انها مابتفطرش :-)
   يبقى خذ :-*******************************************************************
   
   كل سنة و ماما بتجبلك فانوس ينورلك بيتها بالالوان و الانوار علشان متوهش و تعرف ترجع
   
   :-XXXXXXXXXXXXXXXXXXXXXXXXXXXXXXXXXXXXXXX

1. 

   Baskouta
   الأربعاء, 11 أغسطس, 2010

   رمضان كريم يا يوسف
   كل سنة وانت طيب
   وكل رمضان وانت احسن يوسف في الدنيا
   
   يلا اختار الفانوس اللى يعجبك
   
   http://egyptal.files.wordpress.com/2010/07/ramadanlamps.jpg
   
   ان شاء الله رمضان الجاي تفطر مع ماما وانت اللى تجيبلها فانوس.

1. 

   Wanda
   الجمعة, 20 أغسطس, 2010

   كل سنة و انت طيب يا سى يوسف :-)
   11 سنة :-)
   كده لا يجوز القبلات بقى :-)
   كبرنا و بقينا شباب خلاص
   معلش مش حقول رجالة لسه شوية خذى رحتك لحد ما تكمل ال18 سنة
   
   انشاء الله تكون سنة جميلة و تعمل كل الى نفسك فيه و الى فى نفس ماما و تيتا و خالو
   :-)
   
   انت عايز كنافة و عليها 11 شمعة :-)
   
   بس متنساش طنط واندا فى حة نونو كده :-)

1. 

   Hager ZaǮbal
   الثلاثاء, 24 أغسطس, 2010

   مش عارفه ..
   
   انا كنت داخله اقول كومنت ..
   لكن، لما قريت اول كومنت ليكي لقيتني سكت ..
   وجعني اوي ...
   
   يارب تكوني بخير ..
   
   و
   والسنه الجايه ..
   انتي عارفه انا عايزه اقول ايه ...

1. 

   richardCatheart
   الأربعاء, 25 أغسطس, 2010

   كل سنه وانت طيب يا يوسفيا رمضان كريم وسعيد عليك يارب
   
   وكل سنه وانت طيب لعيد ميلادك يارب نشوفك عريس زى القمر
   
   ربنا يحميك ياحبيبى

1. 

   Wanda
   الجمعة, 10 سبتمبر, 2010

   طنط واندا جاية تقول كل سنة و انت طيب يايوسف
   مش حتدينى كحكية صننه من الى ماما جيباهولك ؟؟

إرسال تعليق