الخميس، سبتمبر 08، 2011

بتحصــــلى ســـاعـــات ...




المشــــهد
 
ليـــل داخــلى
اوضــة نـــوم اخــويا اللى قاعـــد
بيشـــتغل ع الكـــمبيوتر بتاعــه
وانا بفــــرد جسمى على ســـريره
و استغطـــى و اناااااااااااادى 

 
يا يووووووووسييييف
تعالى فى حــضن ماما ننــام شــوية
 
ياتى متلكئأ من الغـــرفة الآخــرى
و بغمغمة و بطء 
تخـــرج الكــــلمات منه 

  طب .. يعنى 
أصل مــوش عـــاوز أنــام دلوقـــت

بيتهـــرب بشــكل مهــــذب
 
 
طيب عشـــان خاطـــرى
تعالى نيمنى
و ابقى قوم انتا بعد كده
 

ف إطار التكتيك المتبع دايماً لسحب العيال
للنوم بالحيلة
وفى الغالب بتنتهى بإنهم بينيمونا احنا 
ويفضلوا هما صاحيين
 
 
لأ يا ماما ... 
كدا هنام من غير ما أحس
 
إستنتاج ذكى مبنى على خبرات سابقة 

 
 
طيب تعال فى حضنى دفينى مالبرد !
 

خطة بديلة
ومناورة استدارجية مضمونة النتائج
تنتهى بصعبانى عليه
و تكوره فى حضنى
عشان يعدى الليلة و يسكتنى
 
هاتناموا من دلوقتى ؟؟!
 
سؤال عابر من أخويا 
و اللى 
قاعد شغال قصاد النت
 
 
أيوه ... هنام شوية 
وبعدين ابقوا صحونى
 
صمت و حالة سكون لمدة ثوانى
و بعدين صوت عياط مكتوم و نهنهة
وإنتباه
و خروج  مذعور من الحضن
جلوس
و محاولة الامساك براسى لرفعها 
و التيقن
ثم السؤال الأستنكارى المفزوع
 

ماما 
أنتى بتعيطى ؟!!!؟
 
فى محاولة فاشلة للإنكار
  
 لأ يا حبيبيى
 
بثقة لا يزحزحها أى شك

 

لأ بتعيطى
   
 مالك يا حاجة؟؟
 

الصوت جاى 
هذه المرة من الجالس امام شاشة الكمبيوتر
 
-
مفيش حاجة
بصوت مخنوق و يتخلله بكاء
يحاول التوقف بلا جدوى أقول
 
 
بس يعنى .... يا يوسف
اصل ساعات .... الواحد
بيبقى مخنوق .... 
و مضايق شوية
م الدنيا
 
صمت لثانيتين ثم بثقة و يقين 
يرد يوسف :
   
 آه ... بتحصلى ساعات
 
 
نعم يا أخويا ؟!؟
 
اخويا يدورلنا من ورا المكتب مزبهلاً سائلاً
 
 
بيحصلك ايه كده سمعنى ؟

 
ايوه
ساعات انا كمان الدنيا بتعمل حاجات
تخلينى زعلان
 
البراءة تخلينى فى حالة مفاجأة 
و حيرة و ف حتة وسط
بين البكاء و الضحك 
فيستكمل اخويا فاصل السخرية :
 
 
انتى ياحاجة 
انتى ... عاجبك كده ؟!!!؟
بهتى ع الواد
هو أنتى كل يوم ليكى ساعة نكد
دنيا ايه الى خانأكى
منك
لوه
ليها
 دانتو تخنقوا 
 المجموعة الشمسية كوكب ..كوكب
استهدى بالله كدا يا ست و روقى
 
هز الراس بالموافقة 
و محاولة ايقاف حنفية الدموع
 
خلاص ... خلاص
موش زعلانة ولا حاجة
 
سؤال مصحوب بتحفز واستعداد لأذى 
شخص ما مجهول الهوية
 
 
متزعليش ياماما مين اللى مزعلك
و أنا أكسرهّولك

مفيش حد يا حبيبى
يعنى معقولة حد يقدر يزعلنى  
وانتا معايا ؟!!!
   
 مانا بقول برضو ..
 
تفكير سريع و مفاجىء
و اقتناص لحاجة و كانت تايهة ...
 
 
ماما
 
 
نعم يا حبيبى
 
تصورى ان البعوضة 
عندها تلاتلف عين فى دماغها
 
محاولة بريئة لألهائى وتغيير الموضوع
استجيبلهت على الفور مبدية انبهارى 
و اندهاشى التام بالمعلومة
 
 
ياااااااااه 
 مش ممكن ؟؟ّّ
بس بتعمل ايه بيهم دول كلهم ؟؟!!
 
يتفاجىء بسؤال لم يكن فى الحسبان
فيرد :
 
 
موش عارف ...!! 
بس طب عشان خاطرى متعيطش بقى  
 
حاضر ... خلاص بطلت أهوه
 
يطبطب على كتفى بإنتظام شديد
كعقرب الثوانى ولحد ما أسكت
و ضحكة مستنكرة مصحوبة 
بتعليق من بعيد بيقول :
 
 
لا حول و لا قوة الا بالله
ما مل الأول .. اما انتو عالم غريبة
 
اخويا يتلفت للنت تانى 
ويكمل النقر على مفاتيحه
يوسف يحضنى و بقوة
ويبوسنى فى عيونى المغمضين
و يطبطب علي شعرى
لحد ما أطمن و اهدى و اروح فى النوم
 
خـــــــــــــتام
 
------------------------------------

هناك 22 تعليقًا:

فاتيما يقول...

وحشتنى

ريري كربكه يقول...

ربنا يخليلك ابنك وتشوفيه عريس
الاطفال دول بيقولوا حاجات تخليكي
مش تندهشي لأ ده تبقي عايزه تكليهم من كتر العسل اللي بيبقى طالع في كلامهم
تقبلي مروري

عالمى ازرق يقول...

ربنا يسعد قلبك بيه دايما

غير معرف يقول...

ابنى اسمة يوسف

L.G. يقول...

في بعض الأحيان عندما ينتابني ضيق شديد وأذهب أجلس على الأرض ناظرة للسماء ودموعي تنزل كالأمطار
أجد ابن أختي ذو الثلاث سنوات يحضر ويضع يده الصغيرة على كتفي قائلا : أنا بحبك يا سماح
وكأن حبه كفيل أن يمحي أي ألم

متعك الله بقربه وأرضاك دائماً
تحياتي

اقصوصه يقول...

ربنا يخليلك يوسف

فعلا الاطفال نعمه

الله لا يحرمهم حد

محمد سعد القويري يقول...

السلام عليكم ورحمة الله
تحية عطرة
اعتذار .. لأن التعليق خارج موضوع التدوينة
دعوة للمشاركة في مشروع مقروءاتي
للعام الرابع على التوالي
لمزيد من التفاصيل
http://qweary555.blogspot.com/2011/11/1432.html

Ramy يقول...

طمنينا عليكى

لو سمحتى يا فاتيما

ابن السور يقول...

اصدق المشاعر تلك التي تلمسها في الام .. واعذبها تلك التي تتحدث هي عنها .. وأجملها عندما تتلمس بنفسك حنانها وصدقها
هذا البوست يحملك الى عالم الامومه .. بصدقها وبدفئها وبحنانها ... وبتفهمها لعالمها الخاص

اللهم احفظ يوسف ومن أحب يوسف وأجعله قرة عين امه وأبيه
وحقق الحلم فيه
انك يارب على كل شيء قدير

ظلالي البيضاء يقول...

أم يوسف ..
أكثر من تدوينتين عن يوسف في يوم واحد ممكن انفجر بالبكاء .. وأعجز عن إغلاق حنفية الدموع من عيوني ..
أما زوجتي وأولادي ..

يارب يرجعلك يوسف بالسلامة وتشوفيه وتحضنيه وتنامي وياه .. وتبوسيه بين عيونه .. ياااااارب ..

آسف إن كلماتك حارقة .. تحرق القلب .. بس لزوم إيماننا بالله يخفف مرارة الصبر ..

يارب يفرج همك أختي أم يوسف ..
يارب يا فاتيما ..

غير معرف يقول...

مش عرفت اقولك ايه غير ربنا يخليلك يوسف ويباركلك فيه وتشوفيه احلا عريس
انا كمان اتمني يحيي ليكون كيوسف ابنك ^_^

dalia يقول...

مش عارفه الموضوع دا فكرني بحوار داخلي قد ينتابنا وكأنه صدام بين قسوة الحياة وبراءتها..بس صدقيني النفس الشجاعة هي اللى بتنتصر في النهاية يا فاتيما
تحياتي

شيماء علي يقول...

ربنا يقويكي ..
و يكرمك ..
و يفرح قلبك بيوسف .. دلوقتي .. و على طول .
على فكرة انا بحبك أوي :)
ايوة ماتقابلناش .. و ايوة مش دايما باعلق هنا ..
بس انا فعلًا بحبك اوي .. من غير سبب .. لله في لله كدة .
:)

منجي باكير يقول...
أزال أحد مشرفي المدونة هذا التعليق.
حميد يقول...

ربنا يخليه
نصيحتى ليكى أن تعلميه وتحببيه فى العلم ليس العلم فى المدارس فقط , بل فى الخارج ليكون مرموقا
أنا بحب الأطفال الصغار أووى
ربنا يجعله زى النبى يوسف عليه السلام فى جماله وأخلاقه وعفته
إقبلى هذا المقال هدية منى
http://mytadwen.blogspot.com/2011/07/blog-post_18.html

Noha Saleh يقول...

ربنا يخليهولك ويحفظه
ماتندهشيش بيطلع من العيال حاجات غريبة جدا
ربنا يحفظهم
سعيدة بمرورى فى مدونتك

سامى أبو سريع يقول...

السلام عليكم::: ممكن استاذن حضرتك للانضمام معى فى مدونتى البسيطة هذه لأنى وبكل صراحة لم اعرف احد من الاصدقاء عنده مدونة واعتذر:::

http://samiaboserea.blogspot.com/

^ H@fSS@^ يقول...

نسيت اني في بلوج و كنت عاوزة اعملك لايك، سلامي ليوسف
ربنا يفرحك بيه

الاحلام يقول...

اشعر بان لكل موقف تبريره لديكى واشعر ايضا انه تبرير صحيح
يوسف اجمل شىء فى الدنيا اتمنى من الله ان يجعله من احسن الناس فى العالم
تحياتى ابوداود

شــــمـس الديـن يقول...

حبيت اقوللك ان ليكي وحشة ... عالم المدونات واحشني و انت من ضمن العالم دا , يا رب تكوني فاكراني :)

sun of free dom يقول...

بوست راائع ...

Uouo Uo يقول...


thx

كشف تسربات المياة
غسيل خزانات
شركة نظافة عامة

Related Posts Plugin for WordPress, Blogger...