الاثنين، سبتمبر 20، 2010

طـــعـــم الحــــياة ( يوم إفتراضى )




يلا يا قطة 
صح النووووووم يا حبيبى 
المنبه ضررررب 
يا يوووووووسسسسسيييييييييف



لأ ..متبصليش البصة دى
لحسن هقول كلمة مش كويسة ع الصبح
مهو مش سيادتك تناملى متآخر 
و انتا عارف كيويس ان فيه مدرسة بكرة 
و متلحقش تاخد كفايتك من الراحة 
كل هذا بمزااااجك
و بعيييين تصحالى مكشر ومتعكنن 
مش منظر يعنى 
يلا سيادتك قوم وحالااااا
قولى يا ماما صباح الخير 


لأ بالمنظر النيلة و الوش مش المغسول 
و لا السنان دى ... مينفعش
ذنبى ايه انا !!!
روح الحمام والبس  واتهندم
و اشوفك زى القمر مفيكش غلطة
و انتا منور كدهون ف لبس المدرسة
  ساعتها الصبح ييجى بجد 
هروح المطبخ و ارجع الاقيك جهزت
ماشى ؟




ايه ؟؟ ... لأ طبعا 
مينفعش تشغل الكمبيوتر و تسمع اغانى
اختك لسه مغمضة عيونها و خخخخخ 
من ساعة يا دوب
 و ما صدقت انها راحت ف النوم  
لأ .. و مينفعش تبوسها كمان 
 هتقلقها و تصحييييها 
طب ..احدف البوسة من بعيد 
هتوصلها بالبريد الجوى
الله ...  يعنى هيه حبكت
وخلاص الحب بيدلدق دلاديق ع الصبح !!!
بكرة تكبر يا خويا وتجرجرها وراك ع المدرسة 
اما نشوف ساعتها هتعرف تخلى بالك منها 
و لا الندالة المتآصلة هتتجلى 
و تقولى اوف و زهقت و مليش دعوة و الحركات
بتاعت الولاد دى 
مش هتقول كدا خاااالص ؟!!! 
يا سلام؟!! ... هنشوف
و اما ترجع ابقى لاعبها و بوسها 
زى منتا عايز 
دلوقتى .. ع الحمااااااااام


احم احم
من هذوها الفتى الوسيم 
اللى ظهر ف بيتنا  فجأة
انتا عاوز مين حضرتك ؟؟؟!!
عاوز يوسف ؟
لأ ..انتا يوسف ؟!!؟
متأكد ؟
يا لهوتينى ... معقوله هذا هو ابنى ؟؟؟
و لا استاذ جامعة و رئيس وزرا يا ناس 
مش شكل شاب صغنن و رايح مدرسة 
يا خراااااااشى على الوسامة 
طب مش حرام علينا اللى هيحصل للبنات دلوقتى
يعنى البنية من دول تركز مع الميس 
و لا تقعد تعاكس فيك بقااااااا
انتا قمر يا حبيبى 
و اجمل حاجة ان الشنطة جاهزة من بليل
بحب انا الناس المستعدة دى و منظمة حالها 
اصل  يسوفى
مش زى العيال ... قصدى الرجالة الملخبطة
الزنانة الرخمة دى



عمو ؟
دا نايم يا حبيبى و ف سابع نومة 
اصله جه امبارح متآخر وكنت سعادتك 
بتاكل رز مع الملايكة
كان نفسه يشوفك 
دخل بص عليك وانتا نايم 
و باس جبينك وسابلك المصروف بتاع اول يوم 
انا قولتله .. مش لازم يعنى وشكراً
بس هوه قالى ..يوسف دا ابنى و حبيبى  و صديقى
و اول يوم دا مميز جدا عنده و عندى
و قررت ابقى الراعى الرسمى لليلة دى 
مرضتش اقوله لأ .. اصله بيحبك  فعلا
و مينفعش حد يحبنا كدا ونكسفه 
قال هيستناك لما ترجع 
و نتغدى كلنا سوا و تحكيله عملت ايه النهاردة
 

نعمممممممممم ؟
مصروف منى انا روخرا ؟
ايه شغل النصب دا
انتا عاوز تاخد مننا احنا الجوز 
لا لا لا ..هوه استكراد ؟!!
طب خلاص خلاص .. النهاردة بس 
اوستثناء ... عشان تدلع نفسك 
بس متخدش على كدا و حياتك 
عشان الميزا .... 
ايوه منتا حافظ اهو
الميزانية لا تسمح 
انتا حبيبى قلبى يا يوسف 
و انا بحبك عشان عاقل و اخلاق





اتفضل كيس الاكل و ابقى اشترى عصير 
و حاجة حلوة زى ما تحب 
بس تحذيييييييير هاااااااام 
السنكوتشات دى لو متكلتشى 
و رجعتلى بيها تانى ...هنضطر اخد موقف احتجاجى 
 و هتفضل بقى من غير اكل
لحد ما ترجع تتغدى .. ماشى؟
طيب
لأ مش وقت لعب مع القطط خااااااالص 
احنا لازم ننزل عشان نلحق الطابور من اوله 
و نسأل على ميت حاجة
يلا بقى روح فرجّ تيتة شكلك الجميل 
و بوسها 
و قولها احنا نازلين و عاوزة حاجة يا توتا
و يا قطتى و دلعها و كدا 



طبعا مفيش داعى ادى نصايح من عينة 
خد بالك من نفسك يا بابا 
و متسمحش لحد يقربلك 
او يدخل معاك الحمام و النظام دا 
و رد ع الناس بأدب و خلى بالك من العيال الصغننة
اوعى تخبط فيهم توقعهم 
و الشنطة تخلى بالك منها 
و ... ماشى ماشى عارفة انك عارف 
و سمعت الكلام دا ميت مرة 
معلش ..خليهم مية و واحد 
يا بنى انا شغلتى مامتك 
يعنى لازم اقول الطقم دا دايمااااا
فسيبونا نشتغل امهات بذمة و اسكتوا 
اتفضل يا لمض  اسبقنى
و هات الأسانسير

 


يا سلاااااام 
اعظم  اختراع ف الدنيا المدارس دى  
هخلص منك كام ساعة وشوف نعمة روبنا 
ايه بهزر بهزر .......يوووه
هوه مفيش روح دعابة ع الصبح ليه؟
طب قبل ما ننزل ومحدش واخد باله 
هات حضن سريع لماما
..............
يا واد هات حضن بقولك 
بلاش بوسة عشان انا مقدرة الموكف 
انك بنتكسف 
بس الحضن  ايه مشكلته ؟
..........
النداء التالت و الاخييييير 
هات حضن يا مجررررررم 
طب دا ليا انا مش عشانك 
يعنى اصول تدعمنى معنويا و عاتشفياً 
عشان هتوحشنى لحد ما ترجع 
و عاوزة جرعة حنان مكثفة
.........
ياض تعااااااالى يخربيت كدا 
متخلنيش انتكب حماقة 
تعالى  .... ايوووووووووه 
بس كدا خلاص اتنيلت حضنتك جرى ايه
شكة دبوس 
طب بذمتك حسيت بحاجة ؟!!
ماشى ماشى
انا مش هتكلم معاك دلوقتى 
عشان هراعى انك لسه صاحى م النوم 
و بتمر بوكت عصيب من عمر الوطن
و اول يوم مدرسة  و ...
بس مردودالك يا معلم  و الأيام بيننا


معقول سنة جديدة جت بسرعة كدا ؟
كبرت يا مجرم و بقيت طولى 
والناس كمان شوية هتفتكرك اخويا الصغنن 
مش ابنى 
انا فرحانة طبعااااا
و يمكن استعبط واقول معرفكشى اشاساً 
ال اخويا ال 
انا اخويا ويحيش كدا 
خلاص خلاص متقلبش وشك
وسيم و زى القمر
هوه حد يقدر يقول غير كدا 
دحنا نخلليه يمسك السلك يا كبير




كل سنة و انتا طيب يا حبيب ماما 
و عقبال اول يوم جامعة 
ياااااااااااه 
ربنا يكرمنى  لحد ساعتها عشان اصحيك برضو 
و املى عينى بشكلك وانتا طالب جامعى 
قد الدنيا .. بس مش هوصلك بقى
هانت .. الأيام بتجرى هوا 
اسرع ما أى حد يتصور 
ربنا يباركلى ف عمرك يا حبيبى 


انا مبسوطة انك رديت بأدب 
على طنط جارتنا ف الأسانسير
و هيا بتقولك ازيك  ....عارف ؟
هيا كدا هتقول عليك جنتلمان خالص
صبحّ بقى ع البواب 
انتا هتعدى عليه كل يوم 
و لازم تبقى لطيف ... هوه راجل طيب كمان  
و هيفرح دايما انك فاكره و بتعامله كويس
و انت خلاص بقيت رادل كبير و رايح شغله
هيا المدرسة دى مش شغلتك برضو؟
 يعنى بقيت شاب محترم
و عندك مسئوليات 
انا عارفة انك قدها و قدود 
منتا حبيب ماما و اسد الغابة  الشجاع بتاعى



يلا شارو لأى تاكسى  جاى
و قوله عابديييييين يا اسطى 
لأ .. مش كله السطة 
أيوه صح فعلاً لحد دلوقتى كله السطة 
و معرفش يعنى ايه السطة دى 
بس شكلها كلمة ايطالى معناها
كله كويس و تمام ..فكرنى طيب 
نبقى نسأل بسكوتة لما نرجع
بس الله يكرمك .. بلاش ابو الليف ع الصبح  كدا 
نفسويتى هتنقفل و انتا ميرضكش 
كفاية انك رايح المدرسة يا ميلص 
هستحمل ايه و لا إيه ؟
هاه ؟ .. مين ؟
لأ مش بعيط و لا حاجة 
دا الهوا طرف عينى 
اعيط ليه يعنى ؟
 اصلى مشربتش النسكافيه بتاعى 
فتلاقينى كدا مش مركزة 
لما ارجع هشربه .. و اقعد افكر  فيك
و اقول يا ترى ...يا هل ترى 
يوسف بيعمل انهى مصيبة دلوقتى
و هيكلمونى امتى  تحديداً عشان آجى
اشارك ف فك الحصار  عن الحى كله
و عشان نمشى عربيات البوليس و المطافى
و امن الدولة من قصاد باب المدرسة 
............
بتضحك 
انا افكر فيك كدا و نصصصصص 
دا اقل حاجة خيالى يوصلها  معاك
اصلى عارفة المهازل اللى هتحصل 
مؤدب .. و هادى !!!
طبعننننننن انتا هتقولى ؟!!!
ابنى حبيبى و تربيتى
اهو تاكسى فاضى جاااااى
شاورله يا سى منص و قول يلا  
عابدييييييييين ......يا السطة




كل سنة و انت طيب
يا حبيبى


-----------------------------------------------------------
هدايا من بسكوتة 
دوس هنا و هنا و هنا و هنا وهنا
-----------------------------------------------------------


هناك 15 تعليقًا:

فاتيما يقول...

كل سنة
و انتا ابنى حبيبى

Doba يقول...

كل سنة وانت ابنى حبيبى انا كمان

بس ها

هو ابنك لوحدك يعنى
ربنا يحميك يا غالى

هبة

Sally يقول...

كل سنة وانت طيوب وحنين علي ماما كدا
زي ما في خيالها واكتر
..
ربنا يجمعكم علي خير يارب

mrmr يقول...

كل سنه دراسيه وانت طيب
احنا كلنا بنحبك يا يوسف ذى ما ماما فاتيما بتحبك
ربنا يبارك فيك يا حبيبى
ويباركلك فى ماما ويخليكم لبعض

Kiara يقول...

عارفه يافاتي

ماما كانت كدا

بس كانت تديني السندوتشات وانا ارجع من غيرها

فتنبسط اووووووووووي

وفي يوم فحلقي واحده لن انسي لها هذا الموقف

بتقول لماما

انا بحب منى اوي ياطنط

ماما انشكحت

ربنا يخليكو لبعض ياحبيبتي

اصلها بتدينا كل يوم السندوتشات بتاعتها

وبتسالنا كل يوم تحبو بكره تاكلو ايه

فااحنا نقولها جبنة مربي

ماما انهارت قواها بئا البت كل يوم تطلب اكل وتحد النوع وانا مبسوووووطة انها بتاكل وبتختار

وهي بتديه للعيال

كان حتتة يوم لن انسااااااااه

************

يارب تفرحي بيه ويجي اليوم اللي تتجمعوا تاني يااحلي ام في الكون

Kiara يقول...

كل سنة وانت طيب يايسوفه ياعثل

عاشقه الرومانسيه يقول...

كل سنه وانت طيب يايسوفه وعقبال الدكتوراه والماجيستير

noora يقول...

كل سنه وانتا طالب ^_^
امزح
كل سنه وانت بتصحى بدرييييي ^_^
امـــــــــــزح
كل سنه وانت بصحة وسلامة ونشاط

عروستى يقول...

كل سنه و انت طيب

فلاشه اربعه جيجا يقول...

ايام الدراسه دى كانت اصعب ايامى بجد
كنت بحب اسال فى اللى بره المنهج لحد ما الاساتذة اتخنقو منى و بدأو يقولو كلام مش معقول..و طبعا انا مصدق تماما اللى بيقولوه..على اساس انهم هيكدبو ليه
بس بعد كدا فهمت و عرفت ان نص كلامهم مالوش علاقه بالموضوع اللى بسأل فيه اساسا

على العموم
كل سنه و انت يا اوفس و عقبال الماستر

iHibo يقول...

تدونة جميلة وفيها حس فكاهي جميل
كما ان قالب المدونة رائع

البهرجة الزائدة في الالوان قتلتني صراحة
سأنتقد المدونة يوما
سلام

غير معرف يقول...

شكرا على البوست الجميل

Baskouta يقول...

كل سنة وانت طيب يا يوسف
عيد أضحى سعيد عليك
ويارب العيد الجاي تكون مع مامي
وتتفسحوا سوا وتفرح قلب ماما بوجودك في حضنها
:)

Ramy يقول...

(:

بس

علشان مجرحش رقة البوست

(:

ربنا يرجعهولك بالسلامة من المدرسة (:

ظل الشمس يقول...

ربنا يخليهولك يارب وتفرحى بيه

Related Posts Plugin for WordPress, Blogger...
hi5